რელიგიის საკითხთა სახელმწიფო სააგენტოს თავმჯდომარე, ზაზა ვაშაყმაძე საქართველოს სახალხო დამცველს, ლევან იოსელიანს შეხვდა.

შეხვედრაზე განიხილეს რელიგიის სააგენტოსა და სახალხო დამცველის ოფისს შორის ურთიერთობების გაღრმავების საკითხები. ზაზა ვაშაყმაძემ ლევან იოსელიანს გააცნო რელიგიის სააგენტოს საქმიანობა და მისი მთავარი პრიორიტეტები. კერძოდ, ყურადღება გაამახვილა სახელმწიფოს რელიგიურ პოლიტიკაზე და მისი მხრიდან რელიგიების თანადგომაზე, რელიგიის სააგენტოს მიერ განხორციელებულ პროექტებსა და ოკუპირებულ ტერიტორიებზე არსებულ უმძიმეს ვითარებაზე. მან დადებითად შეაფასა ის ფაქტი, რომ სახალხო დამცველის ყოველწლიურ მოხსენებაში პირველადაა გამახვილებული ყურადღება ოკუპირებულ ტერიტორიებზე. ზაზა ვაშაყმაძის თქმით, სააგენტოს  წინამორბედ სახალხო დამცველებთან ურთიერთობის მცდელობა ჰქონდა, თუმცა, აქამდე კონტაქტი ვერ შედგა.

საქართველოს სახალხო დამცველმა მადლობა გადაუხადა რელიგიის სააგენტოს თავმჯდომარეს სტუმრობისთვის და აღნიშნა, რომ სახალხო დამცველის აპარატი მაქსიმალურად ცდილობს, ხელი შეუწყოს ნებისმიერი, მათ შორის, რელიგიური დაპირისპირების დიალოგის რეჟიმში გადაყვანას, რადგან ხშირად რადიკალიზმია დაპირისპირების მიზეზი, დიალოგს კი ალტერნატივა არ აქვს. მისი თქმით, სააგენტოსთან ურთიერთობა არსებული ვითარების უფრო ნათელ სურათს შექმნის და რეალურ მდგომარეობას დაგვანახებს, რადგან ობიექტური სურათი განსხვავებული ინფორმაციებით იქმნება.

შეხვედრაზე გამოითქვა ორ უწყებას შორის მემორანდუმის გაფორმებისა და ერთობლივი ღონისძიებების ჩატარების სურვილი.

დასასრულს, ზაზა ვაშაყმაძემ ლევან იოსელიანს საქართველოს რელიგიური რუკები და რელიგიის სააგენტოს გამოცემები - „საქართველოში მოქმედი საკულტო ნაგებობები 2023 წლის მდგომარეობით“, „თბილისში მოქმედი საკულტო ნაგებობები 2020 წლის მდგომარეობით“, „ოკუპირებული მემკვიდრეობა“, „რელიგიის თავისუფლება საქართველოსა და საერთაშორისო კანონმდებლობით“ და „რწმენა თავისუფლების აქტია“ გადასცა..

შეხვედრაში მონაწილეობდნენ სტრატეგიული კვლევის, ანალიზისა და რეგიონების სამსახურის უფროსი, ნინო ჭავჭავაძე სამართლებრივი უზრუნველყოფის სამსახურის უფროსი დავით დავითაშვილი და პროტოკოლის მენეჯერი ნათია გუდაძე.