ადამიანის უფლებათა სამთავრობო გეგმის  2017-2018 წ.წ.  ფარგლებში, რელიგიის საკითხთა სახელმწიფო სააგენტომ დაიწყო ტრენინგები საქართველოს შინაგან საქმეთა  სამინისტროს შესაბამისი თანამშრომლების გადამზადების მიზნით რელიგიური შემწყნარებლობის, ძალადობის და რელიგიის ან რწმენის ნიშნით დისკრიმინაციის საფუძვლით ჩადენილი დანაშაულების გამოძიების კუთხით კვალიფიკაციის ასამაღლებლად.

30 ივნისს, საქართველოს შინაგან საქმეთა სამინისტროს პოლიციის აკადემიაში რელიგიის საკითხთა სახელმწიფო სააგენტოსა და შინაგან საქმეთა სამინისტროს ორგანიზებით, გაიმართა ტრენინგი - ,,ადამიანის უფლებები და რელიგიური შემწყნარებლობა". სემინარი გახსნეს რელიგიის საკითხთა სახელმწიფო სააგენტოს თავმჯდომარემ ზაზა ვაშაყმაძემ და შსს პოლიციის აკადემიის რექტორმა გივი მიქანაძემ. ისინი  მიესალმნენ სემინარის მონაწილეებს და აღნიშნეს რელიგიური განათლების როლი და მნიშვნელობა სამართალდამცავი სტრუქტურების თანამშრომელთა ყოველდღიურ საქმიანობაში.

 ლექცია თემაზე - „სახელმწიფოს რელიგიური პოლიტიკა, კონკორდატი, რელიგიის საკითხთა სახელმწიფო სააგენტოს შექმნა, ფუნქციები და საქმიანობა - წაიკითხა რელიგიის საკითხთა სახელმწიფო სააგენტოს მთავარმა იურისტმა ვალერიან ლილუაშვილმა; საქართველოში გავრცელებულ რელიგიებსა და მათ ისტორიაზე მსმენელებს ესაუბრა სააგენტოს საინფორმაციო - ანალიტიკური სამსახურის მთავარი სპეციალისტი, სერგო ფარულავა; თემაზე - რელიგიის თავისუფლება ეროვნული და საერთაშორისო კანონმდებლობით - ლექცია წაიკითხა რელიგიის სააგენტოს სამართლებრივი უზრუნველყოფის სამსახურის წამყვანმა სპეციალისტმა დავით დავითაშვილმა. ლექციების შემდეგ სააგენტოს თანამშრომლებმა უპასუხეს მსმენელთა კითხვებს.

ტრეინინგში, პირველ ეტაპზე, მონაწილეობდა კრიმინალური პოლიციის, საპატრულო პოლიციისა და სასაზღვრო პოლიციის 50 თანამშრომელი