27 თებერვალს საქართველოს მეცნიერებათა აკადემიაში გაიმართა შეხვედრა, რომელსაც ესწრებოდნენ: მეცნიერებათა აკადემიის პრეზიდენტი, აკადემიკოსი გიორგი კვესიტაძე, აკადემიკოსები: მარიამ ლორთქიფანიძე, როინ მეტრეველი, ზაზა ალექსიძე, მეცნიერებათა აკადემიის წევრ-კორესპოდენტი ჯონი ხეცურიანი, პროფესორები: ლევან ალექსიძე, ბონდო არველაძე, რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე, მანგლელი ეპისკოპოსი ანანია (ჯაფარიძე) და სხვები.
შეკრების მიზეზი გახდა სომეხთა სამოციქულო მართლმადიდებელი ეკლესიის საქართველოს ეპარქიის 2014 წლის 12 დეკემბრის მიმართვა საქართველოს მთავრობის სახელზე. გამომსვლელებმა ისაუბრეს სომხურ-ქართული ურთიერთობების საკითხებზე და აღნიშნეს რელიგიურ-ქონებრივ (საკულტო ნაგებობებთან) დაკავშირებულ თემებზე რელიგიის საკითხთა სახელმწიფო სააგენტოსთან კოორდინაციის აუცილებლობა.